إسمعني بقى ياريس

إسمعني بقى ياريس
إسمعني بقى ياريس
ياريس إسمع بقى
هاقولك كام نصيحة
جد ومش تريقة
وإيييييييييييييه

سيبك من المعارضة
سيبك من رغيهم
ولا اخواننا القضاة
أحسن لك لمهم

بيقولك الدستور
وكلام ماعرفش ايه
وهو يادوب أشفور
وعليه كام ألف جنيه
وإييييييييييييييييه

وصحافتهم وكدابة
بتألف أي كلام
بيضحكوا ع الغلابة
ماتشوف بيقبضوا كام

لو قلبهم علينا
يبطلوا النفاق
حرية إيه يا إخواننا
ما تبصوا على العراق

الحرية دي مش غنوة
تتغنى في عيد ياناس
دي حاجة خصوصي حلوه
ومش لأي ناس
وإيييييييييييييييييييه

ريسنا ياحبيبنا
ياحتة سكرة
انت اللي باقي لينا
يا شمعة منورة

الحكم في إيد جنابك
لو يرضيك ورثه
ماهو ملك للي جابك
يا معارضة إخرسوا
يامعارضة إخرسوا
وإييييييييييييييه

ياريس مايهمكش
الضنك اللي إحنا فيه
العمر أهو بيعدي
فيه ايه هانبكي عليه


بلاوي الدنيا كتيرة
في شارع أو في حارة
والموت علينا حق
في قطر وفــ عبارة

الرزق كتير ياريس
سيبك من الجاحدين
دي ناس مش فاهمة حاجة
وكمان مفلسين

حركة ماعرفش ايه
وطالعة بتتظاهر
اه ياولاد الأيه
صحيح الدنيا مظاهر

ومحطة بتصورهم
وتجيبهم ع الهوا
علشان تعمل فضيحة
ويقولك ده الدوا

لو المحطة دي صادقة
كانت تقول بلاويها
ياعيني على بلدهم
وع اللي بيجرى فيها
وإيييييييييييييييييه

وخلينا فـ موضوعنا
ومشاكلنا الداخليه
شكرا لوزير الصحة
ووزير الداخلية

الصحة تمام وحديد
والجسم مافيهش عيب
أل بيقولك تلفيق
واللي يقولك تعذيب

إيه يعني لما ظابط
يفضي هموا فينا
ويروقنا بالفلكة
ولا بطريحه متينة

الظابط ده بني أدم
ولابد نريحه
يعني نطرمخ عليه
مش نجري ونفضحه
وإييييييييييييييييييه

الناس مش لاقية العيش
و واقفين في الطابور
ايه اللي غاصبك ياخي
ماتروح تاكل بيتيفور

واللحمة والفراخ
مجرد شكليات
إخواننا في الصومال
ماحدش منهم مات
وإيييييييييييه

والزيت والسمن دي بدعة
وفيهم كوليسترول
الطرشي غذاء المعدة
ومعاه شوية فول

الشقة والعربية
كلام فارغ ياناس
الستر كفاية علينا
والرك ع الإخلاص
وإيييييييييييه

اسمع نصيحتي ياريس
و هد البرلمان
ده شكله مش كويس
وها يربي لنا جنان

ماهر ذكي